قصة عيني والخراج: تجربة من الألم للفَرج

 

أواخر شهر يناير 2025، نهار عادي نعست فيه، ولكن فقت الصباح وعيوني ماشي هما هما، خصوصاً العين اليسرى. كاتشوف مشوش، وبدات تجيني الدوخة، الرّضان، والصداع، وحتى التلفون ماقدّرتش نشوف فيه. مشيت مباشرة 25 يناير عند أول طبيبة عيون، دارت ليا الفحص، وقالت لي: "يمكن ضربك فيروس ديال البرد، وماعندك والو، غير البرد وغايمشي"، وعطاتني دوا Virgan وOptipred، وزادت نظارات للاستجماتيزم بنسبة 0.75، وقلت ماشي مشكل.

 

دوزات سيمانة، قلت نلعب ماتش ديال الكورة باش نحرك الدم، ولكن منين لعبت حسّيت عيني زادت فيها الألم، وولات كاتضرّني فاش كانحرّكها، وحتى الرؤية بقات مشوشة بزاف.

 

17 فبراير مشيت عند طبيب ثاني، حتى هو فحصني وقال نفس الهضرة: "ماعندك غير استجماتيزم خفيف، كلشي مزيان". وعطاني Blephagel، Chibro Cadron، وNavitae collyre.

 

ولكن الحقيقة أن الحالة بقات كما هي، ولات أسوأ: التركيز ضعيف، العين كاتضرّني من الداخل، والإحساس الغريب ما بغاش يمشي. قررت نمشي لواحد طبيبة محترفة فكازا، دارت ليا فحوصات عميقة: راديو، طبوغرافية القرنية، فحص الشبكية، والدموع. ولكن فاش كملت، قالت ليا حتى هي: "ماعندك حتى حاجة تخلّع، وحتى عملية تصحيح النظر ما تحتاجهاش". وعطاتني دوايات Ayziter، Thealose، Blepharette، وPhisiodose.

 

تقبلت الوضع بالعافية، وبديت نحاول نتعايش مع الألم وقلة التركيز، ولكن حسّيت أن شي حاجة ماشي هي هاديك، حيت الإحساس كان كيوصل حتى للأنف والوجه، وبالخصوص من الجهة اليسرى. منين كانعس على الجنب الأيسر، كانحس بواحد الضغط فالعين وحتى فالوجه.

 

مشيت عند طبيب الأنف والحنجرة، عطاني دوايات تسرّح الأنف، وفعلاً حسّيت براحة خفيفة، ولكن المشكل باقي. ومن بعد، صدفة شفت فالمراية واحد الخراج (قيح) فوق ضرسة فالجهة العلوية، وافتكرت أنني عمرتها قبل عام. داك الخراج كان كيبان كل 3 أيام، وكانفرقعو بيدي، وكيرجع.

 

مشيت لطبيب الأسنان، دار ليا راديو، ولقا فعلاً أن الضرسة فيها قيح، والعرق اللي تحت العين متأثر. عطاني مضاد حيوي، شربتو 6 أيام، وبدأت نحس بالراحة فالعين، ولكن الخراج رجع. قلت خاصني نحيدها، رجعت عند الطبيب وخلعتها، وبمجرد ما خرجات الضرسة وخرج الدم، حسّيت براحة ما عمرني حسّيت بيها، وداك الإحساس اللي كان كايخليني نشك فراسي، تبخر.

 

لكن المشكل ما سالاش، لاحظت أن الجدر ديال الضرسة بقا فالفم، وملي شفت الضرسة اللي عطاني، لقيتها ناقصة. مشيت عند طبيب آخر حيد لي داك الجدر، وارتحت أكثر.

 

فهاد الفترة، العائلة ديالي كانت كتقول ليا: "غير كتوهم، العين ما فيها والو"، ولكن أنا كنت عارف أن جسمي كايقول شي حاجة.

 

ودابا، الحمد لله، حالة عيني تحسنت، والصداع والدوخة نقصو بزاف. ولكن بقى عندي الذبابة الطائرة فالعينين بجوج، وملي مشيت عن طبيبة مؤخراً، قالت ليا: "راه عادي، وماشي حاجة خطيرة".

 

الخلاصة: خراج بسيط فوق الضرسة، كان سبب فمعاناة دامت شهور، وتلف وقلق، وفقدان تركيز، وحتى شك فراسي. ولكن الحمد لله، الصبر والتتبع خلاوني نوصل للحقيقة. الله يجعلها مغفرة للذنوب، ونتمنى اللي يقرا هاد القصة يستافد، ومين يحس براسو ماشي بخير، ما يستسلمش، ويسوّل، ويقلب، حيت حتى شي طبيب ما غادي يحس بيك كيف ما كتحس براسك.